Digter Barries van Boksburg deel graag sy talent
Bernardo skryf al vir ongeveer 30 jaar gedigte.
Gert Renier Johannes Bernardo (71), ook bekend as Barries, het die Advertiser met ’n rustige gemoed en ’n sagte glimlag verwelkom.
Al is woorde volop as dit by sy skryfwerk kom, is hy ’n warm, stil mens.
“Ek was nog altyd baie lief vir skryfwerk en my taal,” sê Bernardo.
Hy deel graag sy gedigte met sy familie, lede van die Ou Apostel Kerk, Boksburg Noord, en ook met inwoners van Andries Scribante Haven, waar Bernardo en sy vrou, Rosa, nou al vir vier jaar woon.
Bernardo woon vir die afgelope 30 jaar in Boksburg en het vir ongeveer 20 jaar met vliegtuigenjins gewerk.
“Snags, wanneer dit stil is, kom alles na my toe. Ek skryf dit in my rofwerkboek en dan sit ek die volgende dag by my lessenaar en skryf die gedigte,” vertel hy.
Sy versameling gedigte het hy “Woorde van die hart” genoem. Sy skryfwerk gaan oor vliegtuie, dorpe, geloof en enige iets wat in sy hart met hom praat.
Bernardo het onlangs ’n gedig oor Valentynsdag geskryf en oor die legendes wat ’n invloed op sy lewe gehad het.
Hy geniet dit om van sy gedigte in die kerk voor te lees, al knaag die senuwees so bietjie.
“Ek skryf nie om beroemd te wees nie; ek glo net ’n mens moet jou talente met mense deel.”
Hy hou al sy skryfwerk in ’n lêer en sal graag wil hê iemand moet dit vir hom op ’n rekenaar sit.
Indien iemand bereid sal wees om Barnardo te help om sy skryfwerk oor te tik, kontak hom gerus op 071 104 1215.
- Hier is Bernardo se gedig oor Boksburg:
Ons Pragtige Ou Boksburg
Ons pragtige dorp ou Boksburg
Ons dorp met sy goud in sy wand
Hier werk ons almal saam in sweet en in murg
Jy doen dit net vir ons ou Boksburg
Ons pragtige dorp ou Boksburg
Jy ons dorp ’n deel van die Oos Rand
Onder jou voete lê die goue wand
Jy behoort ook en is ook ’n deel van ons Transvaal
Ons pragtige dorp ou Boksbrug
Ons dorp met sy vriendelike mense
Jy met jou uigebreide groot grense
Jou goue hart vervul almal se wense
Ons pragtige dorp ou Boksburg
Hier by jou verdien ons, ons lewensbrood
En so maak ons, ons kinders groot
Ons Boksburg jy is ons dorp, en so sal dit bly.
Follow us:
