Oorsaak van aardbewing moet gou vasgestel word, sê VF Plus
Die werklike oorsaak van die aardbewing wat sentrale dele van die land geskud het, moet behoorlik vasgestel word.
Dit is volgens die noord-wes provinsiale leier van die VF Plus, dr Pieter Groenewald.
“In 2005 het ’n soortgelyke aardbewing, veral Stilfontein, getref en groot skade aangerig waarin selfs ’n woonstelblok vernietig is.”
Die vraag is of die aardebewing op Dinsdag, 5 Augustus, ’n natuurlike oorsaak was en of dit as gevolg van mynbedrywighede is.
Volgens Groendewald het sekere areas strukturele skade aan geboue en huishoudelike artikels soos skilderye opgedoen en versekeringsmaatskappye is soms onwillig om eise uit te betaal, aangesien hulle soms beweer die aardbewing is weens mynaktiwiteite waardeur skade uitgesluit word.
“Dit is juis om hierdie rede dat die werklike oorsaak spoedig bepaal moet word sodat inwoners nie verder verontrief word deur die sloer van uitbetalings van versekeringsmaatskappye nie.
“Ek sal hierdie saak dadelik opneem met die betrokke minister om ’n spoedige uitslag te verseker,” sê Groenewald. – @IschkeBoksburg
